U jeku svoje najveće popularnosti: Čuvena glumica postala časna sestra

25.12.2023. | 20:48

Glumica Edita Majić prije gotovo dvije decenije odlučila se za isposnički život u vrijeme svoje najveće popularnosti. Edita je birala život bez cipela, u tišini, u molitvi, nakon čega je uslijedio odlazak u pustinju, pisali su mediji.

Nekadašnja glumica otišla je u samostan Sv. Josipa u španskom gradu Avila, gdje je postala časna sestra karmelićanka.

“Taj susret s Bogom dogodio se odjedanput, kao bljesak, neočekivan dar njegove ljubavi koja se uliva u tvoje biće, apsolutno, odjedanput, nezadrživo i do kraja. Odjednom mi je sve postalo jasno. Dobila sam odgovore na sva postavljena pitanja”, rekla je 2003. godine hrvatska glumica.

Javnost u Hrvatskoj je bila iznenađena, jer gotovo da je odluka uslijedila preko noći, a mnogima nije bilo jasno šta je uticalo na to da jedna od najvećih balkanskih ljepotica iz korijena promijeni život.

Edita je živjela bez grijanja, tople vode, spavala je na ležaju od slame, u molitvi i postu.

Mani Gotovac, književnica s kojom je Edita sarađivala, svojevremeno je izjavila da je glumica pokušavala bezuspješno da preboli nesrećnu ljubav, kao i da je konzumirala narkotike, a pominjao se čak i heroin. Navodno, na kraju je riješila da pobjegne od svega.

Ipak, Editina porodica je ovo demantovala, a ona lično je iz Avile poslala pismo u kome je istakla da to nije istina, te da Mani i ona nisu prijateljice.

Edita je u jednom intervjuu objasnila da se odlučila na promjenu zbog razočarenja površnošću života.

“Koji je razlog zbog kog vrijedi živjeti? Ako je to samo ovo spoljašnje… Ovih nekoliko godinica proživjeti što ljepše, a potom nestati u ništavilu, s tijelom prekrivenim crvima u nekom tamo hladnom grobu… Onda je bolje uopšte da ne postojim”, rekla je Edita.

Sestra Edita je 2017. odlučila da započne život izvan samostana, u pustinji. Njena majka Jadranka je prije nekoliko godina govorila o svojoj ćerki, prenosi Glossy.

“Već dugi niz godina ona je osjećala da je Bog zove na drugačiji i radikalniji način življenja. Od samog početka znala je i koji je to način. Bilo je to pustinjaštvo. Živi izvan manastira na pustom i usamljenom mjestu, nenaseljenom i u samoći”, ispričala je Jadranka.