Deseti dan potrage! Djevojka nestalog Mateja otkrila sadržaj posljednje poruke koju joj je poslao

09.01.2022. | 12:15

Već deset dana traje potraga za Matejem Perišem, Splićaninom koji je posljednji put viđen oko 2.30, 31. decembra u noćnom klubu u Beton Hali u Beogradu.

Matejeva djevojka Sanja, ispričala je da se s njim posljednji put čula nekoliko sati prije nego što je nestao bez traga, kao i da ne vjeruje da je kobne noći konzumirao drogu i da, ako i jeste, da mu je neko “to sipao u piće”.

“Nekoliko sati prije nego što je nestao poslao mi je video poruku, ali ja sam bila na poslu i telefon mi se ugasio. Kad sam oko ponoći stigla kući, odgovorila sam mu na tu poruku i legla sam da spavam.

Probudila sam se u sedam ujutro i vidjela da mi nije poslao poruku za laku noć, što uvijek radi. Tada sam ga upitala ‘je li sve OK’. Odgovora nema. Oko 14 sati sam mu opet poslala poruku i opet ništa. Znam da on ne spava toliko dugo, nema šanse… Kasnije sam se čula s njegovim prijateljima koji su mi rekli da je nestao, da mu je jakna tu, da ne znaju što se dogodilo. Bili su van sebe”, ispričala je Sanja.

Ona dodaje da je dodatno pogađaju priče o tome da je Matej konzumirao drogu.

“Oni uopšte nisu dio te priče. A i da jesu, ko bi prenio drogu preko granice. A i oni tamo apsolutno nikoga ne znaju, gdje bi to nabavili? On se meni javio u 14.30 sati kad su prešli granicu, pa u 18 sati kad su ušli u apartman, pa u 21.30 s večere. Na tom videu su se vidjele tri boce vina, ali njih je bilo sedam. Atmosfera je bila vesela, neki su pili bijelo, neki crno vino. Čekali su večeru, ništa posebno”, opisala je Matejeva djevojka.

Sanja je dodala, da ako bi se ispostavilo da je Matej kobne noći bio drogiran, da je to moglo da se dogodi samo ako mu je neko “drogu sipao u piće”.

“Možda će glupo zvučati, ali ako i jeste bio drogiran, njemu je to neko sipao u piće”, zaključila je Sanja.

Nenad Periš, Matejin otac, izjavio je za hrvatske medije da će se iz Beograda vratiti sa sinom, i da ga svi koji imaju djecu razumiju o čemu govori.

“Ja sam siguran da će MUP Srbije učiniti sve da do Mateja dođemo zajedno. Hvala svim ljudima koji ga traže i tokom praznika. Nažalost, nema novih informacija, a policija me pita pojedine stvari i tako otklanjaju dileme”, rekao je Nenad Periš, piše Blic.