Olujna bura u Hrvatskoj: Kolovozi mokri i klizavi, savjetuje se oprezna vožnja

28.01.2023. | 12:11

Kolovozi su jutros u većem dijelu Hrvatske mokri i klizavi, postoji mogućnost poledice, a u unutrašnjosti, u Lici i Gorskom kotaru, mjestimično pada snijeg, saopštio je Hrvatski autoklub (HAK), javila je Hina.

Na primorju duva jaka olujna bura koja otežava saobraćaj. Vozačima se savjetuje da brzinu i način vožnje prilagode uslovima na putu i ​​da na put ne kreću bez zimske opreme.

Saobraćaj na državnom putu DC118 u Veloj Luci na Korčuli prekinut je zbog saobraćajne nesreće.

Za sve grupe vozila otvoreni su autoput A6 Rijeka-Zagreb na dionici Delnice-Kikovica, stari put kroz Gorski kotar (DC3), most dr Franje Tuđmana u Dubrovniku i Paški most.

Zbog vjetra samo za putnička vozila otvoreni su autoput A1 Zagreb-Split-Ploče između čvorova Sveti Rok i Posedarje, državni put Maslenica-Zaton Obrovački (DC54) i Jadranska magistrala između Karlobaga i Svete Marije Magdalene (DC8).

Jak vjetar duva i na riječkoj obilaznici (A7) na mostu Rječina, a vozi se uz ograničenje brzine. Na većini graničnih prelaza nema izvještaja o dugim čekanjima, prenosi Hina.