Vjerovali ili ne, desilo se! Zaboravili kćerku na pumpi, tek u drugom gradu shvatili da je nema

09.08.2021. | 13:47

Porodica koja se sa odmora iz Srbije vraćala u zapadnu Evropu, zaboravila je na jednoj benzinskoj pumpi kod Niša četrnaestogodišnju kćerku.

Nestanak djeteta primijetili su tek u Lapovu, pa su alarmirali tamošnju policiju koja je obavijestila niške kolege, pa je djevojčica zbrinuta do povratka zaboravnih roditelja.

Kako prenose mediji, nesvakidašnji događaj odigrao se 7. avgusta oko 7.45 sati na pumpi na deonici autoputa Beograd Niš gdje su se članovi porodice, inače iz Turske, zaustavili radi odmora, prenosi Blic.

“Djevojčica i njen brat su spavali na zadnjem sjedištu automobila kada su roditelji napustili vozilo. Tokom njihovog odsustva i četrnaestogodišnjakinja je izašla iz kola ali se mimoišla sa ocem i majkom. Oni su ušli u automobil i nastavili put a da im djeteta nema primijetili su tek kod Lapova, kada se dječak probudio i kazao im da mu je sestrica nestala”, navode sagovornici upoznati sa ovim slučajem.

Turski državljani otišli su u Policijsku stanicu Lapovo i zatražili pomoć nakon čega je alarmirana i niška policija.

“Policijski službenici PU Niš odmah su otišli na benzinsku pumpu i zatekli tinejdžerku kako sjedi na klupi. Kod sebe je imala putnu ispravu, pa je potvrđeno da se radi o maloljetnici koju roditelji traže. Policajci su ostali uz devojčicu sve dok je roditelji nisu preuzeli i nastavili put”, kaže izvor za Telegraf.

U niškoj Policijskoj upravi potvrđeno je da su njihovi službenici zbrinuli maloljetnu djevojčicu zatečenu na benzinskoj pumpi u okolini Niša do dolaska roditelja.