Autobus sletio u rijeku: Najmanje dvoje ljudi poginulo, 12 se vode kao nestali nakon nesreće

11.10.2021. | 10:38

Najmanje dvoje ljudi je poginulo, a 12 se vode kao nestali, nakon što je autobus sletio u rijeku nedaleko od grada Šiđijažuanga na sjeveru Kine, javili su danas državni mediji.

Na društvenim mrežama objavljen je snimak na kojem se vide ljudi kako stoje na krovu skoro potopljenog autobusa u rijeci koja je prešla preko mosta izvan grada Šiđijažuanga, udaljenog 265 kilometara od Pekinga.

Vlasti provincije Hebej saopštile su da je spaseno 37 od ukupno 51 osobe u autobusu.

U susjednoj provinciji Šanksi usljed jake kiše i poplava evakuisano je više od 120.000 ljudi nakon urušavanja više hiljada kuća i pošto je uništeno više od 190.000 hektara usjeva.