Izraelska vojska pronašla tijela tri taoca iz Gaze: Među njima i Šani Luk

17.05.2024. | 20:08

Kontraadmiral Izraelskih odbrambenih snaga Danijel Hagari rekao je da je vojska pronašla tri tijela taoca iz Gaze, među kojima je i Šani Luk (22), mlada djevojka koja je postala simbol brutalnog napada Hamasa nakon otmice na muzičkom festivalu “Nova”.

Hagari je rekao da su tijela koja su identifikovana kao Itzak Gelerenter, Amit Buskila i Šani Luk — otkrivena u operaciji koju je preko noći sprovela vojska i izraelska služba bezbjednosti Šin Bet.

Ubijeni su 7. oktobra na muzičkom festivalu, a njihova tijela su potom odnijeta u Gazu.

Hamas “paradirao” njenim tijelom

Snimak 22-godišnje Šani Luk kako paradiraju nakon što su je kidnapovali Hamasovi militanti naveliko je kružio društvenim mrežama nakon napada.

Vojska nije dala trenutne detalje o tome gdje su njihova tijela pronađena, prenosi Skaj njuz.

Podsjećamo, Šani je bila na muzičkom festivalu mira blizu Kibuc Urima kada je došlo do napada 7. oktobra prošle godine. Prvo su ispaljene rakete a onda su se pojavili naoružani militanti i počeli da pucaju po gomili, prenio je “Insajder”. Posjetioci festivala su rekli “Si-En-En”-u da su ljudi odmah počeli da bježe od masakra, prolazeći pored mrtvih tijela na zemlji.

Snimak mlade žene

Nedugo nakon napada na festivalu počeo je da cirkuliše snimak mlade žene sa dredovima u pikapu, okružene Hamasovim militantima. Vidi se da je ona skinuta u donji veš, da su joj noge savijene pod neprirodnim uglom, dok je jedan vojnik drži za kosu. Pojedini su pljuvali na njeno tijelo.

Lice joj se nije vidjelo, ali je porodica uspjela da je prepozna zahvaljujući njenim karakterističnim dredovima i tetovažama, pisao je Vašington post.

Rikarda Luk, Šanina majka, je nakon toga preko video snimka zamolila za informacije u vezi sudbine njene kćerke, koja je u ranim 20-tim godinama i ima dvojno, njemačko-izraelsko državljanstvo, ali nažalost, nije joj bilo spasa.