Dala otkaz i prodala kuću da bi se brinula o napuštenim životinjama: Kaže da se nije pokajala

20.03.2021. | 14:22

Prije samo godinu dana Odri Rašel (33) živjela je u četvorosobnoj kući i vodila svoj pansion za pse.

Na kraju dana vraćala bi pse vlasnicima, ali je bila posvećena njezi i udomljavanju napuštenih životinja i pasa lutalica.

Nažalost, bilo ih je toliko da nije mogla svakome da pomogne. Kao veliki ljubitelj životinja, poželjela je da svoj život promijeni iz korjena.

Prodala je kuću, napustila svoj posao, i uselila se u 200 godina staru kuću na farmi, postavljajući kao svoj prioritet to da brine o napuštenim životinjama.

I do sada se nije pokajala.

“Započela sam sa Utočištem prije godinu dana. Spasila sam mnogo životinja u svom životu ali bila sam limitirana. Željela sam da imam više vremena za njih, više prostora da ih smjestim i više novca da trošim na njihove potrebe”, kaže Odri.

U svoju novu kuću preselila se u februaru 2020. godine ali je imanje širila tako što je kupovala obližnja. Kupila je i drugu kuću za svoju sestru kako bi se i ona preselila i sa njom vodila Utočište. Utočište je u međuvremenu postalo neprofitna organizacija koja može legalno da prima donacije od drugih ljubitelja životinja koji žele da brinu o njima.