Salsa, rumba, ča-ča-ča: Časne sestre osmislile koreografiju, zaplesale i oduševile svijet VIDEO

09.06.2024. | 18:05

Časne sestre u južnom italijanskom regionu Pulja vole da plešu i pjevaju, baš poput onih iz filma “Sister act” iz 1992. godine sa Vupi Goldberg.

Riječ je o brazilskim časnim sestrama koje žive u Pulji i pripadaju Kongregaciji Razapetog Isusa Franjevačkih misionara.

Pošto ove časne sestre nisu mogle da učestvuju na religioznom kongresu u Brazilu, gdje bi pričale o iskustvima u Italiji, poslale su video sniman na lokaciji Gravina u Pulji, gdje upravljaju školom za djecu koji se zasniva na Montesori metodi.

Nakon što se video sa njihovim plesom i pjevanjem pojavio na društvenim mrežama, bile su gosti italijanskih medija. Pričale su o tome da im je muzička podloga poslata iz Brazila, a da su one same osmislile koreografiju.

Radile su u njihovom studiju za snimanje zajedno sa djecom iz škole, i aranžirale su muziku koja se bazirala na gitari. Dvije časne sestre, Džema i Marianđela su, prije nego što su postale časne sestre, bile balerine u Brazilu.

– Počele smo sa plesom u Bogoslužbenoj službi plesa, i to sve vrste plesa, salsu, rumbu i ča-ča-ča. Nismo ni sanjale da ćemo zbog naše igre stići i do medija. Bila je to naša jednostavna koreografija. Naša pjesma je zahvalnost i ljubav prema prirodi i Bogu – izjavila je časna sestra Marianđela, i sa osmijehom dodala da ih je episkop Monsinjor Ruso koji je tu svega tri mjeseca, pitao: “Da li su poludjele?”

Italijanske “Sister act” nastavljaju da zabavljaju publiku širom svijeta svojim veselim videom, piše RTS.