Ništa lakše: Čokoladni kolač za koji se sastojci mjere šoljom

14.06.2021. | 12:43

U trenutku kada se zaželimo nečeg slatkog, a kod kuće nemamo nikakav desert, najčešće imamo volje za pravljenje samo onih najjednostavnijih kolača.

Upravo je takav brzi čokoladni kolač “na čaše”- lagani kolač za koji vam ne treba ni vaga jer kao mjera za sve sastojke služi najobičnija šolja ili čaša od 2 dcl.

Sastojci: 

• 3 velika jaja
• pola čaše šećera
• pola čaše kakao praha
• 1 čaša oštrog brašna
• 1 čaša kisjele pavlake
• pola čaše ulja
• pola kesice praška za pecivo
• 2 kašike ekstrakta vanile (ili 1 vanilin šećer)

Priprema:

Pleh za pečenje namažite s malo ulja ili maslaca i pospite brašnom. Rernu uključite na 180 stepeni.

U jednoj posudi pomiješajte sve suve sastojke – šećer, kakao, brašno i prašak za pecivo. U drugu posudu ubacite, jaja, ulje, kisjelu pavlaku i ekstrakt vanilije te miksajte kratko dok se sastojci ne povežu. Zatim ubacite mješavinu suvih sastojaka, miksajte minut i ulijte u pripremljen kalup za pečenje.

Kolač pecite oko 30 minuta. Gotov je kada se odvoji od ivica pleha, a kako biste bili sigurni da je pečen, probodite ga na sredini čačkalicom. Ukoliko na njoj nema mokrih ostataka smjese, kolač je pečen i možete ga izvaditi iz rerne.